عن الاضراب أتحدث هنا

السلام عليكم

بصوا من الآخر

أنا شايف إن الدافع الأول لعدم الاضراب هو الجبن ... اللي هو نقص الشجاعة .. اللي هو الخوف اللي بيخلي البني أدم زي الأرنب

يعني تهديد الداخلية ده و الله لا يمكن يتقال إلا من حكومة بلطجية عارفة إن الناس جبانة و خوافة و مربوطة من رقبتها في ساقية لقمة العيش

أنا هنزل الكلية .. بس عشان حاجات تانية غير إني أحضر .. عشان أحس إني مش عبد ذليل في بلد خلاص ما بقتش بلدي

عشان أقف في ميدان العباسية مع الناس اللي هتقف ..عشان أحس إنهم مخدوش مني إرادتي

عشان أقول لنفسي إن أنا مش بخاف .. و إن أنا لما البلد كانت بتتسرق و الناس كلها اتضربت على قفاها ما سكتش

عشان أقول لكل المفكرين المصلحين السلبيين خليكم جوة الحيطة .. الجبن سيد الأخلاق

و إحنا بقى بتع الشعارات .. إحنا بتوع الاضراب اللي مالوش لازمة

خلينا لكم الحكمة و الروية و النظر الثاقب .. البسوا أقنعة الحكمة عشان تخبوا جبنكم

عشان المحاضرة اللي هتفوتك أغلى من إنك تقول: انا إنسان .. أنا مش جبان .. انا مش بتكلم وبس

----------

اللي هينزل من بيته ياااا ريت يلبس اسود في اسود ... بس عشان المشاركة الوجدانية حتى

اللي فات ده رأيي , و لو حد شايف فيه حاجة تزعل ... مش مهم

النظام الجاهل

السلام عليكميا جماعة خلاص .. و الله ما قادر استحمل .. إيه القرف العنيف اللّي البلد فيه ده ؟؟ إيه النظام الجاهل اللّي مسيطر على كل حاجة حوالينا ده ؟؟و الله يا جماعةالبلد دي مش باين في الأفق إنها هتتعدل أبدا .. فيها ألف مرض و مليون داء عضال ليس لهم علاج حتى الآن

.

أنا هتكلم على حاجة واحدة بس .. النظام الجاهل الفاشل..الدولة الوحيدة في العالم .. بل في المجموعة الشمسية كلها اللّي جمعت سيطرة الأمن الغاشم مع البيروقراطية المتعفنة مع الغباء و العته الإرادي و اللا إرادي في وقت واحد

.

بصوا .. في حاجة مضايقاني جدا .. كل واحد بيشغل منصب من أول الوزير لحد البواب مرورا بالموظف الأمّي و المشرف الطلابي المختل عقليا بيعيش في دور الحاكم بأمره و العارف بأمور الدنيا و الدين..مثلا تلاقي واحد مقعدينه على باب مصلحة حكومية و ممسكينه كوز درة يسأل اللّي داخل إنت رايح فين ؟ داخل لفلان الفلاني . يسألك : ليه ؟ إنت مااااااااااااااااااال ******* ؟؟ و تلاقي الكمسري بينظم الناس في الأوتوبيس كأنه بينظم جيش تحرير القدس .. و موظف عشان تمضي منه ورقة و لا إذن مجلة يقعد إسبوع بيخلل أمها في الدرج و بعدين يقول لك المجلة مش عاجباه ..هو كان العقاد و لا طه حسين عشان يوافق و لا يتنيل ؟؟جايبين لنا عينات من أغبى السلالات البشرية و مخليينها مسئولة عن قضاء حوائج الناس

.

و تلاقي كل غفير منهم عنده فلسفته الخاصة في الحياة .. و مقتنع بشوية حاجات لو قلتها لقرد فوق شجرة هيقولك مين الغبي اللّي بيفكر كدة؟

.

رد عليه بقى و قول له : المسئولين مش إحنا

مصر أم الدنيا

موضوع عجيب قررت أكتبه أول حاجة في البلوج ..كنت ناقشته في إحدى المواقع منذ أكثر من عام

إيه هي أكتر حاجة جايبانا ورا؟ كمصريين يعني ؟

ممكن تكون السلبية العجيبة ؟ الأنانية الرهيبة ؟ يمكن تحجر الرأي و التعصب الغبي ؟ يمكن التخلف العقلي ؟ إحتمال يكون معمول لينا عمل و مدفون في مقبرة توت عنخ أمون ؟

هل الإعلام الجاهل , و التلفزيون العقيم الذي لا ينشر إلا ثقافة الخواء و السطحية , هل هذا هو السبب؟

بالراحة كدة , هتكلم في كام نقطة... و يمكن نعرف اكتر إحنا إيه جايبنا ورا

اولا : السلبية العجيبة

الحرامي خلاص جه و أكل رزق الناس, المشكلة بقى إن الناس مش عايزة تتحرك و لا تتغير و لا تتحسن ولا تقرّب من ربنا

لو حصلت خناقة في الشارع ولا كأن حصل الحاجة و عادي يسيبوا الناس تاكل بعض....ولو واحد عربية خبطته بيموت من الملل عشان محدش بييجي ينقله المستشفي.... و لو واحد بيعاكس واحدة على محطة الأوتوبيس الرجالة بيقفوا يتفرجوا و مش بعيد كمان يضحكوا..ء

الشهامة و الجدعنة و النخوة و الرجولة... كلها مفاهيم ذابت في دوامة السلبية اللّي إجتاحت مصر المحروسة

ثانيا : تحجر الرأي و رفض الآخر

الواحد بيبقى سلبي و مش عايز يفهم إنه غلط .. أناني و شايف إن ده الصح .. مخه فيه ضفدعة بس حاسس إنه أوتي حكمة الحكماء

أنا شايف إننا لازم نبدأ بفرض إننا ممكن نكون غلط .. أفكارنا و طريقة حياتنا و مسلماتنا و قناعاتنا المسبقة عن العالم المحيط بينا,كل ده فيه إحتمال الخطأ

لازم نبدأ بتقبل الآخر ..بتقبل كل الأفكار الغريبة و التي قد لا نلمس صحتها من البداية

بالنسبة لي كمسلم ,سأتجنب ما يتعارض مع الثوابت الدينية المتفق عليها من قبل العلماء الثقات

و هذا لا يتعارض بتاتا مع إحترام و تقبل الآخر

ثالثا : إنعدام الوعي السياسي و الأغلبية الغبية

ناس جهلة منتفعة تتحكم في ناس جاهلة غير منتفعة و مغلوبة على أمرها كمان!!ا

هو ده الوضع السياسي ببساطة في مصر..أغلبية جاهلة مش عارفة حقوقها ولا واجباتها ولا عارفة الألف من كوز الدرة,يجيلهم شوية أفاقين عاملين فيها حكومة خايفة على مصالحهم يا عيني يا ولاداه فينساقون كالخراف وراء حادي القطيع الفظيع المريع

و المنتفعين و المطبلاتية و الهلابين و الحرامية و المتسلقين و المنافقين هما اللّي نافعين, لكن الناس اللّي عايزة تصلّح بجد من غير إعلانات و دعاية و زمامير مالهومش غير البيادة الميري تسلّم عليهم و على اللّي جابوهم

رابعا : الإعلام التافه المضلل

جينا بقى لمصيبة العصر...يا تلفزيون يا ....المفروض يقولو يا تلفزيون يا غبي

مسلسلات كلها قصور و حمامات سباحة و عربيات بالملايين كإن الأحداث بتدور في السويد مثلا,أغاني تافهة مبتذلة قذرة و كلمات سطحية و ألحان مستهلكة

برامج من الزبالة و مذيعات عايزين الحرق,معدّي برامج معاهم إبتدائية, و مخرجين خريجي معهد صرف صحي قسم إخراج

و سواقط القيد بيتكلموا في الدين, و الفرارجية بيتكلموا في السياسة, و الممثلين بيتكلموا في السياسة...و أنا و إنت ..و رقصني يا جدع

أمّا الصحافة القومية فتشبه فلا يمكنك أن تقرأ فيها خبرا صادقا إلا في صفحتي الفن و الرياضة..و صفحة الوفيات طبعا

الصحف المستقلة متنوعة الفصائل ..فمنها الحائز على دكتوراه في النفاق جامعة مبارك,و منها المنضم لرابطة ماسحي الجوخ

و هناك الصحف المستقلة المعارضة,منها الصادق الجرئ, و منها المصاب بإنحراف إدارته و أفكار هيئة تحريره الزلنطحية ..و عذرا في التعبير !!ا

خامسا : العشوائية الحياتية المهلبية

انعدام التخطيط على مستوى الفرد و الأسرة و الهيئات فالمؤسسات ثم الوزارات تليها الدولة جمعاء .... ثواني أخد نفسي عشان بنهج

كله ماشي بالحظ و التساهيل و النصاحة و الفكاكة,و عك عك ربك يفك,مع إن ربنا أمرنا بإتقان العمل

و كله بيقتي و كله بيشتغل في كله و على كله,و النقاش بيبني عمارة و الممرض بيبقى جرّاح

و على رأي عمنا الفاجومي

أهي بامية على لوبيا على قرع إسطنبولي

بتطلع يا بلدنا على وش التسقية

..........

طبعا القائمة ممكن تكمل إلى ما شاء الله ..بس كفاية الخمس نقط دول نركز عليهم

و أنا طبعا قصدت يبقوا خمسة عشان الحسد ..أصل العالم كلّه بيحسدنا عشان إحنا سبعتلاف سنة حضارة

و سمعني سلام نتعالي يا دنيا و شوفي الكنز اللّي اسمه المصريين